Laudio Ikastolak Eskolako Agenda 2030ean parte hartzen du Aiaraldeko beste ikastetxe batzuekin batera, eta, konkretuki, 7. GJH (Garapen Jasangarriko Helburua) “Energia eskuragarria eta ez-kutsagarria” hobetzeko lanetan ibili gara aurreko ikasturtetik.
Pasa den ikasturtean hainbat ekintza proposatu genituen 7. GJH-a modu aktiboan jorratzeko, aurten aukeraketa egin dugu eta hilabete hauetan zehar elkarlanean ibili gara ekintza praktikan jartzeko. “Energia aurreztu, Aiaraldea babestu!” lemapean energia aurrezteko sentsibilizazio kanpaina bat martxan jarri dugu, eskualdea hobetzen laguntzeko helburuarekin eta, zehazki, gure herrietan ingurune gero eta jasangarriagoak bultzatzearen alde.
Horretarako, besteak beste, dekalogo batean barne bildu ditugun energia aurrezteko hainbat aholku aztertzen eta lantzen egon gara. Hori dela-eta, hilabete hauetan egindako lana ikastetxetik haratago zabaltzeko eta herritarren parte hartzea zein konpromisoa bultzatzeko, gaur kalera atera gara.
Apirilaren 22a, Ama Lurraren Nazioarteko eguna izanda, argi itzalketa burutu dugu Herriko Plazan. Iluntze aldera, plazako argiak itzali ditugu energia aurreztearen alde, planeta osasuntsuago bat izan dezagun.
Bertan ikasleen energia aurrezteko gomendioak plazaratu eta bertsoak abestu dituzte.
Ingurugiroaren alde egitea denon esku dago!
